EL FORU SOCIAL POLA EDUCACIÓN EN CATALUÑA, MANIFIESTA:

1.      QUE QUEREMOS UNA EDUCACIÓN EMANCIPADORA QU’IMPLIQUE A TOL MUNDU

Entendemos la educación como un derechu universal y un bien públicu, que va más acullá de les etapes d’escolarización formal de les persones, puesto que forma una parte insepartable de la vida de los ciudadanos y de les ciudadanes. La educación ye una ferramienta imprescindible na formación integral de les persones y ye, poro, una responsabilidá coleutiva que supera la marcación escolar y que l’alministración tien el deber de garantizar en condiciones de calidá y d’igualdá. La educación, amás de ser una necesidá pa la emancipación personal y coleutiva, ye una de les condiciones pa facer posible una sociedá cohesionada, inclusiva y xusta.

Asina, hemos asumir una xera doble. D’una parte, fainos falta la implicación de toles estayes sociales nel ameyoramientu del sistema educativu; pero, al tiempu, fainos falta tamién un trabayu interdisciplinar ente toles estayes y axentes sociales qu’intervienen nel procesu educativu de les persones a lo llargo de la so vida. Y equí facemos referencia a la familia, la escuela, los servicios sociales, los centros abiertos, les entidaes culturales, la educación d’adultos, los medios de comunicación, la educación non formal, la educación nel tiempu llibre, el mundu llaboral. Naide pue refugar la so parte de responsabilidá.

2.      QUE LA EDUCACIÓN EN CATALUÑA TIEN DE DAR RESPUESTA A LOS FONDOS CAMBEOS SOCIALES Y TIEN DE CONTROLAR LES CRECIENTES TENDENCIES PRIVATIZADORES.

L’actual modelu de globalización afala la mercantilización de la educación y del conocimientu, al traviés d’instancies como’l Pautu Xeneral de Comerciu y Servicios qu’impulsen la OMC y el BM. Tamos énte una presencia creciente de los intereses privaos, tanto a les enseñances obligatories, como la Universidá y la Formación Profesional. Too esto pon en peligru la concepción de la educación como bien públicu y como derechu fundamental.

Los cambeos sociales y de mentalidá esperimentaos nel nuesu país nes décaes postreres tuvieron repercusiones na enseñanza. Referímosnos, ente otros, al surdimientu d’estremaos modelos de familia; a la incorporación masiva de les muyeres al trabayu remuneráu; a la incompatibilidá d’horarios llaborales, escolares y familiares coles necesidaes d’atención de les neñes y los neños y la mocedá; a les teunoloxíes nueves; a l’ametida de la inmigración, a la nueva conceición d’inclusión que trai darréu la incorporación del alumnáu con discapacidaes estremaes a los centros ordinarios. Una riestra de necesidaes nueves que nun s’acompañaron de l’atención y los recursos necesarios que les alministraciones teníen que poner na enseñanza pública, de manera que l’actual sistema educativu en Cataluña nun garantiza abondo una educación de calidá pa tol mundu nin la imprescindible función de cohesión social.

Más específicamente, nun se fixo l’esfuerzu necesariu pa que la distribución de los alumnos espeye la diversidá cultural y social qu’hai na sociedá, sinón que se permitió la concentración del alumnáu estranxero y con menos recursos nunes mesmes escueles. Un fechu que fai mala d’algamar una cohesión social que namás ye posible pente medies de la convivencia nes mesmes aules d’alumnáu d’estremaes procedencies, niveles sociales y culturales, capacidaes y llendes.

3.      QUE YE NECESARIO UN CAMBÉU DE MODELU EDUCATIVU NEL QUE LA ENSEÑANZA PÚBLICA SEYA L’EXE VERTEBRADOR.

Énte esta situación, faise imprescindible dafechu un cambéu de modelu educativu que garantice amás de la so función de tresmisión de la llingua y la cultura propia del nuesu país, la función social d’aidar a permediar desigualdaes y ufrir una verdadera igualdá d’oportunidaes.

La educación tien qu’afalar los valores que formen parte del patrimoniu común de la sociedá democrática: la llibertá de conciencia, la llibertá d’espresión, el respetu a la pluralidá y la diferencia, la reconocencia de la diversidá cultural, afeutiva y sexual, los valores non sexistes y la cultura de la paz. Afitamos tamién el calter llaicu de la escuela pública, que tien de tratar la historia y les carauterístiques de les estremaes relixones y cosmovisiones de forma aconfesional y ha refugar conteníos y enfoques de calter doctrinariu o confesional, que pertenecen esclusivamente a la esfera privada de les persones, y que tien de ser respetuosa tanto cola diversidá como cola ausencia de creyencies.

Poro, ye imprescindible que la enseñanza pública seya l’exe vertebrador de tol sistema educativu, que tenga’l necesariu prestixu social pa convertise na opción mayoritaria, y se refugue l’actual fragmentación social a la escuela. Poro, fai falta tornar la creciente privatización de la enseñanza en tolos aspeutos y fai falta revisar l’actual política de conciertos. Fai falta tamién redefinir el conceutu de serviciu “públicu”, qu’ha entendese como aquello que pertenez a la comunidá y ta xestionao y supervisao democráticamente.

Fai falta afalar les midíes afayadices de prevención del fracasu escolar, d’atención al alumnáu con necesidaes educatives especiales con discapacitaos d’orde físicu, síquicu o sensorial, como tamién del alumnáu superdotao, d’atención al alumnáu viniente d’estayes sociales y económiques desfavorecíos y d’acoyida del alumnáu recién llegao, con propuestes concretes d’actuación y la implicación de tolos profesionales y del restu de la comunidá educativa. Fai falta tamién l’inxertamientu de la educación audiovisual y la presencia de la educación emocional pa favorecer l’autoestima de toos y toes y la so formación global.

Poro, ye necesario y urxente ameter les partíes presupuestaries empobinaes a la enseñanza pública, col envís d’allugar el gastu educativu de Cataluña, como poco, al nivel de la media europea.

Pa rematar, les persones y organizaciones que participaron nesti Foru Social pola Educación en Cataluña, cuidamos que la educación ye una arbía fundamental p’avanzar pa escontra una sociedá más xusta, más igualitaria y más granible, y que, poro, ye imprescindible que toles estayes y axentes sociales s’impliquen nel algame d’esti oxetivu.

Y por eso ye polo que les persones equí presentes COMPROMETÉMONOS:

·         a lluchar por esti ameyoramientu de la sociedá y, poro, de la educación.

·         a facer propuestes, dende cada ámbitu, p’algamar una educación que respuenda a les necesidaes de tola población.

·         a trabayar de manera interdisciplinar ente les estremaes estayes y axentes sociales.

·         a enfotanos nel algame d’una enseñanza pública, llaica, inclusiva y de calidá qu’axunte a tolos neños y mozos de Cataluña.

·         a puxar pa que s’elimine la fragmentación social a los centros educativos, que vien darréu de la esistencia de redes educatives diferentes y desiguales

·         a afalar un alderique fluyíu y plural ente les persones y los axentes qu’intervienen nel fechu educativu.

Y por eso polo que les persones equí presentes ENCAMENTAMOS a les Alministraciones afayadices:

1.      Que tean sollertes pa qu’haya una educación universal y de baldre, que respuenda a les necesidaes reales de les persones y asegure una verdadera igualdá d’oportunidaes.

2.      Que s’apurran les arbíes y los recursos amañosos pa garantizar una educación a lo llargo de tola vida y se pongan los medios acionaos pa facer vidable una ufierta educativa amplia qu’incluya tolos ámbitos de la educación.

3.      Que se garantice la respuesta pública a les necesidaes educatives de les persones adultes cola redefinición afayadiza de les escueles d’adultos, y en concreto, que se garantice l’atención educativa a les persones adultes inmigraes.

4.      Que s’asegure la educación infantil pública y de baldre de 0 a 6 años y seya reconocida como un derechu de tolos neños y neñes. 

5.      Que se trabaye por adautar la vida llaboral a les necesidaes de los padres y madres pol aquel de que puean facer en condiciones la so función educativa.

6.      Que se garantice l’ameyoramientu de les competencies teóriques y práutiques de tolos profesionales (maestros/es, educadores sociales, profesores, pedagogos/gues, psicólogos/gues, etc.) qu’intervienen nos procesos educativos, y s’aseguren unes condiciones de trabayu dignes pa toos y toes, a partir del primer ciclu d’escuela infantil.

7.      Que les Alministraciones faigan un apueste decidíu por priorizar una rede pública d’educación en tolos niveles educativos y que respuenda a les necesidaes de toles persones. Que se faiga una revisión fonda de los criterios de concertación de los centros privaos o d’iniciativa social, pa que tolos centros que reciben fondos públicos cumplan tolos requisitos llegales, sociales y propios d’un serviciu públicu. Aquellos que nun los cumplieran nun tendrán que recibir el menor niciu de subvención pública.

8.      Que les Alministraciones tendrán que tener como oxetivu a llargu plazu que toles escueles y los servicios educativos financiaos con dineru público seyan de titularidá pública. Pa ello fai falta establecer mecanismos nuevos pa que los centros privaos que tengan una voluntá de serviciu públicu se puean inxerir na rede pública, garantizando’l caltenimientu de los puestos de trabayu.

9.      Que se pongan tolos recursos humanos, téunicos y materiales acionaos p’atender tola diversidá del alumnáu y p’asegurar un sistema educativu inclusivu y una verdadera igualdá d’oportunidaes.

10.    Que se garantice la llaicidá del sistema educativu, la educación intercultural y non sexista, qu’afale la igualdá ente los homes y les muyeres, el respetu a les estremaes llingües y cultures, opiniones y creyencies, el respetu a les estremaes orientaciones sexuales ya identidaes de xéneru, que trabaye pola creación d’una conciencia crítica, que de puxu a los valores democráticos y se suprima de los planes d’estudios cualesquier enfoque y conteníu doctrinariu, sexista, homófobu o racista

11.    Que s’asegure una inversión mayor en tolos ámbitos sociales que cinquen a los procesos educativos: educación d’adultos, educación non formal, educación nel tiempu llibre, comunidaes educatives, educación social, equipamientos socioculturales, centros abiertos, biblioteques, asociacionismu educativu, espardimientos, etc. Que s’asegure una ametida curiosa de los presupuestos dedicaos a la educación, qu’alluguen el gastu del nuesu país na media europea. Esto trai darréu un compromisu de les Alministraciones a asitiar el gastu d’educación nun 6 % del PIB, nun máximu de tres años.

Ø       QUEREMOS UNA EDUCACIÓN EMANCIPADORA

Ø       QUEREMOS QUE’L SABER, LA CULTURA Y LA EDUCACIÓN NUN SEYAN UNA MERCANCÍA MÁS, SINÓN ARBÍES DE TRESFORMACIÓN Y AMEYORAMIENTU SOCIAL

Ø       QUEREMOS QU’ESTI FORU SEYA UN IMPULSU NA LLUCHA POR UN SISTEMA EDUCATIVU PÚBLICU, LLAICU Y DE CALIDÁ PA TOL MUNDU

Ø       OTRU MUNDU YE POSIBLE

Ø       OTRA EDUCACIÓN YE NECESARIA

Barcelona, 27 de febreru del 2005.