|
FORU SOCIAL IBÉRICU POLA EDUCACIÓN
Dientro de la marcación
del Foru Social Mundial y del Foru Mundial d’Educación, qu’afalen
la creación d’instancies nueves de promoción d’actividaes,
alderiques y una axenda coleutiva, amás de dar puxu a un
fexe de foros rexonales, nacionales y temáticos, les
organizaciones que roblemos convidamos a toes y toos a la
realización d’un Foru Social Ibéricu Pola Educación (*) de
los pueblos y naciones del Estáu Español y Portugal, nel mes
d’ochobre-payares del 2005, na ciudá de Córdoba - España.
Tenemos pa nosotros que podemos contribuyir al afitamientu
d’una Rede Mundial de Llucha escontra la mercantilización de
la educación y pola democratización efeutiva del derechu a
la educación pública de calidá pa toes y toos.
L’oxetivu del Foru ye
facer vidable un alderique ampliu nel que participen toles
estayes sociales col envís d’incluyir toles perspeutives y
asitiar a la educación como prioridá y responsabilidá de
tola sociedá. Nesti sen, empobinámosnos a les persones
arreyaes a la educación tanto formal como non formal.
Entamamos cola idea que
la educación ye un derechu universal y un bien públicu, al
que toles ciudadanes y ciudadanos tienen el derechu a
algamar en condiciones d’igualdá y les Alministraciones
tienen la obligación de garantizar.
Queremos una educación
emancipadora, que favoreza la rellación igualitaria ente
muyeres y homes, ente les estremaes cultures, y que seya
respetuosa pa coles llingües y cultures de les distintes
naciones.
Queremos una educación
que garantice la igualdá d’oportunidaes, que permedie les
desigualdaes sociales y que puea actuar como remediu
escontra’l racismu, el sexismu y la esclusión social.
Defendemos el derechu que
tienen tolos pueblos y naciones (tamién les del ámbitu
xeográficu onde s’alluga esti foru) a construyir el so
sistema educativu, a crear el so propiu currículu y a usar
la llingua propia como arbía vehicular.
Queremos qu’esti Foru
seya l’espaciu pa entamar propuestes y amestar fuercies pa
siguir lluchando por una educación pública, llaica, y de
calidá pa toos y toes.
(1) Denomación apautada
na xunta del 13 de xineru, celebrada en Madrid con
organizaciones del Estáu Español y Portugal.
|
