LLAMAMIENTU POR UNA

SELMANA EUROPEA DE

MOVILIZACIÓN EDUCATIVA

Nós, axentes de la educación, movimientos, organizaciones, sindicatos, asociaciones y estremaos miembros de la sociedá civil que participemos nel Foru Social Européu de Londres, proponemos a toles organizaciones arreyaes a la educación n’Europa esti llamamientu:

Esta llamada va empobinada a tola ciudadanía, a les y los trabayadores d’escueles y universidaes, institutos, families, mundu de la cultura, de la ciencia, l’arte y l’espectáculu, parllamentarios, organizaciones sindicales y asociaciones.

Tamos encontaos nos principios de la Plataforma Mundial de Lluches adoptada pol tercer foru mundial de la educación en 2004 en Porto Alegre.

La educación ye un bien públicu mundial prioritariu y un derechu humanu inalienable qu’inflúi na vida de toles persones.

Esti derechu ye esencial pal accesu a otros, pa la construcción de valores afitaos na solidaridá, la emancipación y la práutica de la ciudadanía.

Les polítiques públiques han asegurar la realización d’estos derechos.

L’Estáu tien de garantizar de manera universal y gratuita, ensin discriminación nin esclusiones, el plenu derechu a una educación pública emancipadora, a tolos niveles y en toles modalidaes.

Por estes razones asitiámosnos escontra toles polítiques neolliberales n’educación y formación, como aquelles que puen ser inxeríes cola direutiva Bolkenstein.

-Escontra la subordinación de la educación a les necesidaes del mercáu.

-Escontra la precarización del personal que trabaya na escuela.

-Escontra l’ametida de les desigualdaes sociales.

-Escontra l’emprobecimientu y la mengua de los programes que quiten a la mayoría de la población del plenu accesu a la cultura.

Ello ye que la educación, como derechu inalienable de toos, ha ser un serviciu públicu de calidá alta.

-Pol ésitu escolar, la cualificación y el desarrollu personal pa tola mocedá.

-Pola igualdá ente alumnes y alumnos.

-Por una formación de nivel altu y l’ameyoramientu de les condiciones de trabayu pa toles persones emplegaes na estaya de la educación.

-Pola ametida del gastu públicu n’educación (a lo menos el 7% del PNB).

-Por un pensamientu críticu y una ciudadanía activa.

-Por una investigación y enseñanza superior al serviciu prioritariu de la creación y espardimientu de los saberes.

-Pola integración de les persones con necesidaes particulares, inmigrantes y refuxaos.

-Pola participación, la democracia y los derechos d’alumnáu y mocedá.

-Pola mengua de los gastos n’armamentu y defensa y l’ametida nos presupuestos educativos.

-Pola promoción de la paz, la cooperación, la solidaridá y los derechos humanos ensin discriminación.

Nesti sen, les escueles, institutos y centros d’enseñanza superior tienen que se convertir nun sitiu públicu democráticu y coleutivu qu’acueya, reconoza, valore y cree rellaciones ente les estremaes estayes (profesoráu, estudiantes, families y comunidá).

Ye por too ello que nos abulta necesario llevar alantre una movilización amplia de moces y mozos y de tola comunidá educativa en xeneral, families y ciudadanía. Facemos un brinde pola selmana europea de movilización ya iniciatives qu’implique a tola sociedá ente’l 9 y el 15 de mayu del 2005.

ALEMAÑA: Padagoginnen fur den Frieden

REINU XUNÍU: NUT Birmingham

ESPAÑA: STEs-i, CCOO

FRANCIA: Attac France, FSU (SNES-SNESUP-SNUIPP), FERC.CGT, Ligue de l´enseignment, CEMEA, ICEM Pedagogi freiner, GFEN, UNEF

GRECIA: Olme

IRLANDA: Attack

ITALIA: CGIL Scuola, Asamblea de Movimientos contra la reforma Moratti

PORTUGAL: FENPROF

EUROPA: ESIB

CONSEYU INTERNACIONAL DEL FORU MUNDIAL D’EDUCACIÓN