CHAMAMENTO POR UNHA SEMANA EUROPEA

DE MOBILIZACIÓN EDUCATIVA

Nós, axentes da educación, movementos, organizacións, sindicatos, asociacións e diferentes membros da sociedade civil que temos participado no Foro Social Europeo de Londres, facemos a todas as organizacións vencelladas á educación en Europa o seguinte chamamento:

Esta chamada vai dirixida a toda a cidadanía, ás traballadoras e traballadores de escolas e universidades, institutos, familias, mundo da cultura, da ciencia, a arte e o espectáculo, parlamentarios, organizacións sindicais e asociacións.

Reafirmámonos nos principios da Plataforma Mundial de Loitas adoptada polo terceiro foro mundial da educación en 2004 en Porto Alegre.

1. A educación é un ben público mundial prioritario e un dereito humano inalienábel que inflúe na vida de toda a xente.

2. Este dereito é esencial para o acceso a outros, para a construción de valores baseados na solidariedade, a emancipación e a práctica da cidadanía.

3. As políticas públicas deben asegurar a realización destes dereitos.

4. O Estado ten o deber de garantir de maneira universal e gratuita, sen discriminación nin exclusións, o pleno dereito a unha educación pública emancipadora, a todos os niveis e en todas as modalidades.

Por estas razóns estamos contra todas as políticas neoliberais en educación e formación, como aquelas que poden ser introducidas coa directiva Bolkenstein.

• Contra a subordinación da educación ás necesidades do mercado.

• Contra a precarización do persoal que traballa na escola.

• Contra o aumento das desigualdades sociais.

• Contra o empobrecemento e a redución dos programas que privan á maioría da poboación do pleno acceso á cultura.

É por iso que a educación, como dereito inalienábel de todos, debe ser un servizo público de alta calidade.

• Polo éxito escolar, a cualificación e o desenvolvemento persoal para todos os mozos.

• Pola igualdade entre alumnas e alumnos.

• Por unha formación de alto nivel e a mellora das condicións de traballo para todas as persoas empregadas no sector da educación.

• Polo aumento do gasto público en educación (cando menos o 7% do PNB).

• Por un pensamento crítico e unha cidadanía activa.

• Por unha investigación e ensinanza superior ao servizo prioritario da creación e difusión dos saberes.

• Pola integración das persoas con necesidades particulares, inmigrantes e refuxiados.

• Pola participación, a democracia e os dereitos de alumnado e mozos.

• Pola redución dos gastos en armamento e defensa e o aumento nos presupostos educativos.

• Pola promoción da paz, a cooperación, a solidariedade e os dereitos humanos sen discriminación.

Neste sentido as escolas, institutos e centros de ensinanza superior deben converterse nun lugar público democrático e colectivo que acolla, recoñeza, valore e cree relacións entre os diferentes sectores (profesorado, estudantes, familias e comunidade).

É por todo isto que consideramos necesario desenvolver unha mobilización ampla de mozos e de toda a comunidade educativa en xeral, familias e cidadanía. Lanzamos unha chamada pola semana europea de mobilización e iniciativas que implique a toda a sociedade entre o 9 e o 15 de maio de 2005.

ALEMAÑA: Padagoginnen fur den Frieden

REINO UNIDO: NUT Birmingham

ESPAÑA: STEs-i, CCOO

FRANCIA: Attac France, FSU (SNES-SNESUP-SNUIPP), FERC.CGT, Ligue de l´enseignment, CEMEA, ICEM Pedagogi freiner, GFEN, UNEF

GRECIA: Olme

IRLANDA: Attack

ITALIA: CGIL Scuola, Asamblea de Movimientos contra la reforma Moratti

PORTUGAL: FENPROF

EUROPA: ESIB

CONSELLO INTERNACIONAL DO FORO MUNDIAL DE EDUCACIÓN